आपण बऱ्याच कलाकारांना ज्या भूमिकेत बघतो त्याच भूमिकेप्रमाणे त्यांचं व्यक्तिमत्त्व असेल असं गृहीत धरतो. अर्थात, बरेचदा आपल्याला त्यांच्या वैयक्तिक आयुष्याबद्दल फारशी माहितीदेखील नसते. खलनायकाच्या भूमिकेत दिसणाऱ्या कलाकारांना वैयक्तिक जीवनातही प्रेक्षकांकडून परखड प्रतिक्रिया मिळाल्याचे किस्से कमी नाहीत. पण, प्रत्येक खलनायक साकारणारा कलाकार खऱ्या आयुष्यातही तसाच वाईट असेलच असं नाही. अगदी त्याचप्रमाणे, प्रेक्षकांना पोट धरून हसवणारा एखादा कलाकार खऱ्या आयुष्यातही तसाच मिश्किल आणि सुस्वभावी असेलच असं नाही. जागतिक पातळीवरील विनोदाचा सम्राट चार्ली चॅप्लिन याच्या आयुष्यावर बेतलेलं अशाच काहीशा विषयाचं एक नाटक ‘मिलाप थिएटर’ तर्फे आपल्या भेटीस येत आहे. चार्लीच्या स्वभावातील ग्रे शेड आपल्याला या नाटकात बघायला मिळणार आहे. नाटकाचं नाव आहे ‘द क्लॅप’!
निर्माता मिलाप, थिएटर टुगेदर, अस्तित्व, द बॉक्स आणि चार्ली स्टूडियोज या बॅनरखाली ‘द क्लॅप’ हे चार्ली चॅप्लिनच्या जीवनावर आधारलेलं नाटक १५, १६ , १७ मार्चला, रात्री ८.०० वा. द बॉक्स, एरंडवणे, पुणे येथे तर मुंबईत १९ मार्चला रात्री ८.०० वा. प्रबोधनकार ठाकरे मिनी थिएटर येथे रंगभूमीवर आणण्याची योजना आखली आहे. तिकीट विक्री नाट्यगृहाच्या खिडकीवर प्रयोगाच्या दोन तास आधी सुरू होणार आहे. या नाटकाच्या दृष्यसंकल्पनेची जबाबदारी प्रणव जोशी यांनी सांभाळली आहे. आपण सर्वचजण बालपणापासूनच चार्लीचे मूकपट पहात आलो आहोत. केवळ संगीताच्या साथीनं चार्लीनं आपल्या हयातीत अभिनयाच्या बळावर असंख्य प्रेक्षकांचं मनोरंजन केलंच, पण आजही त्याचे चित्रपट जगभरातील प्रेक्षकांची करमणूक करत आहेत. चार्ली चॅप्लिन हे नाव आज प्रत्येक माणसाला माहीत आहे. १९२० पासून चार्लीनं मूक चित्रपट क्षेत्रात एक वेगळं स्थान निर्माण केलं. त्याच्या जीवनाबाबत सांगणारे अनेक चित्रपट, पुस्तकं, नाटकं आली. याच वाटेवरील ‘द क्लॅप’ हे एक वेगळ्या धाटणीचं नाटक आहे. वेगळं अशा अर्थानं की एखाद्या व्यक्तीच्या आयुष्यात घडणाऱ्या अनेक गोष्टी बऱ्याचदा समोर येत नाहीत. आपण काही घटना एकाच चष्म्यातून बघतो आणि त्या व्यक्तीबद्दलचं मत बनवतो. विशेषत: फेमस व्यक्तींच्या आयुष्यात अशा अनेक घटना घडतात, ज्यानं त्यांचं आयुष्य बदलतं. याच जोडीला त्यांच्याशी संलग्न असणाऱ्या लोकांचंही जीवन पालटतं. चार्लीच्या आयुष्यात अशा काही घटना घडल्या आहेत, ज्या लोकांसमोर फार कमी आल्या आहेत. त्या गोष्टींमधून एक वेगळाच चार्ली आणि त्याच्याभोवतीची माणसं उलगडत जातात. चार्लीच्या स्वभावातील ग्रे शेड आपल्याला या नाटकात बघायला मिळणार आहे. चार्लीच्या आयुष्याचा प्रवास इंटरेस्टींग आहेच, पण अजून बऱ्याच गोष्टी मनोरंजक आहेत, ज्या हे नाटक पाहताना रसिकांना अखेरपर्यंत बांधून ठेवतील आणि नाटक संपल्यावर ‘द क्लॅप’ आपसूक वाजेल. याच कारणामुळं या नाटकाचं शीर्षक ‘द क्लॅप’ असं ठेवण्यात आलं आहे.
‘द क्लॅप’ या नाटकाचं महत्त्वाचं वैशिष्ट्य म्हणजे चार्लीच्या ब्लॅक अँड व्हाईट फिल्म्ससारखाच या नाटकालाही कृष्णधवल फील देण्याचा प्रयत्न केला जाणार आहे. चार्लीचा ऑरा तयार करण्यासाठी तशा पद्धतीचे कॅास्च्युम्स आणि सेटसही डिझाईन करण्यात आले आहेत. अशा प्रकारचा प्रयत्न मराठी रंगभूमीवर प्रथमच करण्यात येत असल्यानं निश्चितच ‘द क्लॅप’च्या टिमचं कौतुक केलं जाणार आहे. डॉ. निलेश माने, स्वप्नील पंडीत, नीरज कलढोणे यांनी ‘द क्लॅप’चं लेखन केलं आहे. या नाटकात पायल पांडे, सायली बांदकर, दुष्यंत वाघ, वर्धन कामत, सायली पुणतांबेकर, राहुल मुदगल, या कलाकारांच्या भूमिका आहेत. श्रुतिका वासावे यांनी वेशभूषा केली आहे.
‘मिलाप थिएटर’बद्दल थोडंसं…
मराठी रंगभूमीनं नेहमीच आशयघन नाटकांची परंपरा जपत नाट्यप्रेमींचं मनोरंजन केलं आहे. जिवंत अभिनय पाहण्याची मराठमोळ्या नाट्यरसिकांची हौस 
मराठी रंगभूमीवरील नाटकांनी नेहमीच भागवली आहे. कोरोनाच्या काळातही काही नाटकांनी रसिकांच्या मनोरंजनाचा वसा जपत आपलं काम चोख बजावलं आहे. रसिकांनीही अशा नाटकांना उत्स्फूर्त प्रतिसाद दिला आहे. प्रवाहापेक्षा वेगळ्या नाटकांची निर्मिती करण्यात अग्रस्थानी असणारी मिलाप ही नाट्यसंस्था आपल्या दर्जेदार नाट्यकृतींच्या माध्यमातून रसिकांना आपलंसं करत आपला वेगळा चाहतावर्ग निर्माण करेल. प्रत्येक खरा नाट्यकर्मी, रंगकर्मी वरच्या पायरीवर जाण्यासाठी कायम धडपडत असतो. ही धडपड करत असताना, कधी ठेचकाळतो, कधी थोडी माघार घेतो कधी हवे ते साध्य करतो, तर साध्य वाटत नसतानाही पलीकडे येऊन पोहचतो. मिलाप मध्ये सगळे एकमेकांना हात तर कधी आधार देऊन, नवनवीन प्रकल्प हाती घेऊन या रंगमंचावरील आभासी जगातला आपला अनुभव वाटणार आणि वाढणार यात शंका च नाही. जागतिक पातळीवरील अभिनयाचा अनभिषिक्त सम्राट म्हणून ओळखल्या जाणाऱ्या चार्ली चॅप्लिन या महानायकावर आधारीत नाटक रसिकांसमोर सादर करण्याचं शिवधनुष्य मिलापनं उचललं आहे.
हास्यसम्राट चार्ली चॅप्लिनच्या स्वभावातील ग्रे शेड दाखवणाऱ्या या कृष्णधवल थीममधील ‘द क्लॅप’ नाटकावर प्रेक्षक भरभरून ‘क्लॅप्स’चा वर्षाव करतील याबद्दल शंकाच नाही. या नाटकाला नजीकच्या नाट्यगृहात लवकरात लवकर भेट द्या!
