आजच्या धावपळीच्या जीवनशैलीत ‘संयुक्त कुटुंबपद्धती’ हळूहळू नामशेष होत चालली आहे. आई-वडील, मुलगा, सुनेने एकत्र राहणं तर दुर्मिळच होत आहे आणि जरी राहिले तरी एकमेकांसोबत समरसून आनंदाने जगणं हे आणखीनच कठीण होतंय. हाच विषय विनोदी आणि भावनिक स्वरूपात प्रेक्षकांसमोर मांडण्यासाठी प्रशांत दामले फॅन फाउंडेशन प्रस्तुत आणि गौरी थिएटर्स निर्मित ‘कुटुंब किर्रतन’ हे नवे नाटक प्रेक्षकांच्या भेटीला येत आहे. २१ मार्च रोजी यशवंत नाट्य मंदिरात या नाटकाचा शुभारंभाचा प्रयोग रंगणार आहे.
परंपरा विरुद्ध आधुनिकता – घरातील संघर्ष!
घरात एकत्र राहणाऱ्या पिढ्यांमध्ये जुनी परंपरा आणि नव्या आवडीनिवडी यांचा मेळ घालणं सोपं नसतं. अशाच एका पारंपरिक कुटुंबातील तरुणाचा विवाह होतो.
आई – जी घरातील संस्कार, रितीरिवाज सांभाळण्यावर भर देते.
सून – जी नव्या काळाशी जुळवून घेताना बदल घडवू पाहते.
मुलगा – जो या दोन टोकांच्या विचारसरणीमध्ये सापडतो!
या तिघांच्या मतभेदांमध्ये कधी विनोद आहे, कधी तणाव आहे, तर कधी कुटुंबाच्या भविष्यासाठी होणारा संघर्ष आहे.
घर आणि कुटुंब म्हणजे फक्त नवरा-बायकोच नव्हे, तर त्या घरातील प्रत्येक सदस्यही तेवढाच महत्त्वाचा असतो. घरातील शांतता आणि प्रेम टिकवायचं असेल, तर कधी कधी कोणालातरी दोन पावलं मागे यावं लागतं.
‘कुटुंब किर्रतन’ हा नाटकाचा अनुभव मनोरंजनाच्या माध्यमातून याच विचारांची जाणीव करून देतो.
कलाकार व तंत्रज्ञ
Natak Actors and Technical Team
कौटुंबिक नातेसंबंध, पारंपरिक मूल्ये आणि आधुनिकतेच्या संघर्षावर भाष्य करणाऱ्या या नाटकात संकर्षण कऱ्हाडे, तन्वी मुंडले, अमोल कुलकर्णी आणि वंदना गुप्ते महत्त्वाच्या भूमिका साकारणार आहेत.
नाटकाचे कथासूत्र विनोद रत्ना यांनी लिहिले असून, लेखन संकर्षण कऱ्हाडे यांचे आहे. दिग्दर्शनाची जबाबदारी अमेय दक्षिणदास यांनी सांभाळली आहे. या नाटकाला ज्येष्ठ संगीतकार अशोक पत्की यांचे संगीत लाभले आहे. तसेच, नेपथ्य प्रदीप मुळ्ये यांनी साकारले असून, प्रकाशयोजना किशोर इंगळे यांनी केली आहे.
‘कुटुंब किर्रतन’ हा हलक्याफुलक्या शैलीत कौटुंबिक नात्यांमधील विविध पैलूंना उलगडणारा नाट्यप्रयोग आहे. नाट्यप्रेमींनो, ‘कुटुंब किर्रतन’ चुकवू नका! परिवारासह या आणि कुटुंबाच्या गोड नात्यांची ही भन्नाट रंगभूमीवरील सफर अनुभवा!
